شعر عبطي

مرحبااااااااااااااااااا

لازم ادش البلوق وانفض الغبار من هدومي حدي قديمه صايره .. انا انشغلت بأهلي والسوالف الي صارت لنا مثل ما قلت لكم خواتي الحمدلله ولدوو وحده جابت ولد والثانيه جابت فار اقصد هم ولد بس شكله فار يهبلون واشوي اشغلوني وهم الطلعه والروحه والدراسه مع ان ما بدينا بس هم الواحد مايدري شلون وقته يروح يمشي بسرعه مثل البرق والله يعين الجميع . اشكر تواصلكم واستسمحكم عذرا لاني ما قدرت امركم واشوف اخباركم وجديدكم .

قعدت افكر شنو ممكن انقل لكم عن اخباري .. لقيت قصاصات من الشعر الي انا كتبته خلال الفتره الي طافت .طبعا قلت ليشكل مره نكتب شعر رومانسي ولا فراق بطريقه حزينه قلت بكتب شي بس بطريقه ظريفه مادري انا اشوف انها ظريفه يعني عبطت فيها وقلت اسميه بدال الشعر النبطي اسميه الشعر العبطي .

(انا. وانت . وامي . وخواتك )

____________________________________

عسى الله لا يبين لك غلاتك

وتقول ( اوووالله ) كل هذا تحبني ؟؟

انا بفرقاك من صج صج !! فاتك ..

من الضيقه حسبت ان بتهدني ..

ما غير اقول لأمي عن حلاتك

ولا تسأل عن طراقات جني

خربت وبعتها وهذي سواتك

تخيل وش طلع هالحين مني

قعدت احوس ابي جوال خواتك

ابعرف عنك شنو الي بعدني

ثلاثتهم تراهم مهملاتك

يبون فرقاي وتصير بعيد عني

رقعت الخط من ذموا صفاتك

ابيك وما منهم وحده تغلبني

ابيع الكل بس المس شفاتك

وما همني لو انهم ما اشتهني

سنين العمر هدتني وجاتك

اخذهم بس تكفى لا تهدني

______________________________________________

وسلامتكم

شرح الابيات :

ادعي واقول يا رب لا يجي اليوم ويشوف حبيبي شكثر اغليه وهاليوم اذا بيجي ما يجي الا بالفراق

لان ساعتها بنهبل وانخبل وبسوي كل شي عشان ارجع لك ونكون مع بعض ، لما افترقنا صج طافك سويت شي ما توقعه لان عبالي راح انهد بعض رحت قلت حق امي يمه احب واحد يهبل ويجنن وطبعه وعيونه وكله وسوالفه كل شي حلو فيك قلته حق امي فجأه . بعدين اهيا قامت تكفخني وتهددني تبي تعلم ابوي علي بس هذي ما كتبتها بالابيات لان مالقيت قافيه :> يعني هذي زياده من عندي بعدين عاد انا خربت وبعتها وكله منك انته عادي انفضح بس المهم ترجع لي .. ومن قلة الحيله قعدت ادور بالدليل على تلفون خواتك ابي اكلمهم واسالهم عنك . لقيت ان خواتك مهملاتك ومايدرون عنك وقالولي اتركيه شتبين فيه لا تكلمينه عيب عليج .. عاد انا عصبت وسكرت التلفون بوجهم وقلت مالي شغل بكلامهم ابيع الدنيا عشان اقعد معاك واعطيك عمري عشان اعيش وياك .. وتوته توه خلصت الحتوته

طبعا في هذا الوقت لما كتبت الابيات هذي كنت في قمة الملل وضيقة الخلق ورايحين بر والجو كان غبار ومحد ونسني غير قلم حتى ما في ورقه كتبت على كلينكس وقعدت اضحك بروحي على هالشعر احس انه خرابيط ومحد راح يفهمه غيري لوول .

بحطلكم صورة وصلتني على الايميل بس صوره عجيبه حبيتها حيل

والله فعلا هذي احلى عيون في العالم

ماشالله تبارك الرحمن

وهذا وزنه وشكله كيوووووووت دخل قلبي مو نفس الفيران الي عندنا

ياااااااااااااااااااااحلووووووووووووووووووووووووه

بيا؟؟؟؟؟ .... لا تعليق

شخباركم :p


والله كنت افتر بال youtube

وشفت شي موتني من الضحك . بس صج لا تعليق ...

مرحبا

هاي

شلونكم عساكم بخير؟

هل يومين قاعدين على اعصابنا ننطر لحظات حلوه انشالله بتصير

قاعده اشوف خوواتي ثنتين على وشك ولاده ... كلهم راح يولدون هالشهر الله يهون عليهم .. شكلهم يونس

كل وحده رايحه تشتري ملابسها وملابس الياهل وسريره وسريرها وااغراضهم الي شكلها حدها يونس . انا لما شفتهم والله استانست كيووت حدهم ..

الشي الحلو ان اهما بيكون عندهم يهال مثل القمر وبيرتاحون بعد 9 شهور حمل و ., والشي الي انا احاتييه الي راح يصير ..مثل كل مره ..... الصبح كلهم بيصير امهات مثاليات ويجاابلون الضيوف ويسولفون عن تعب الولاده وشنو صار وها هاينه ولا متعبه .. ولما يروحون الناس .......@@ انا ابتلش اهيا الاخت تنام وتقط ولدها عندي وتقولي هاج مناير .. هذا حليبه وهذي ملابسه ديري بالج عليه .. كأني قاطه قطيه انا وياها عشان نييب هالياهل .. اهيا الصبح وانا بليل نظام شفتات .. وانا بليل اعيش الدور يعني انا امه .. عشان لو انا مو متخيله ان انا امه جان ذبحته لاني ادري راح يكون ازعااااااااااااااج .. الصبح شحلاتهم ساكتين وبليل بتسلطون علينا عفاريت اسمالله عليهم .. المشكله مادري ليش يبجي ,, محد زعله محد طقه ونشربه حليب ؟ والله سؤال يحير ليش الياهل يبجي .

عموما مع كل هذا ماانسى ان هالشي شعور يجنن , اقصد لما خواتي يولدون , الله يقومهم بالسلامه ويباركلهم بعييالهم .

كل عام وانتم بخير

تحديث


اتمنى ما ازعج احد بهالاغنيه .. بس حده مزاجي صفاا عليهاا

الاغنيه مالها شغل بالوطنيه

مرحبا

انا اعتذر صراحه عن القرار الي دعا فيه احد الوزراء لمراقبة المدونات ، اعتذر لان شكلي قبست عليكم ، من اول ما ييت قالو يسوون مراقبه مع ان ليلحين ما بديت الهجوم انا لوول كل الي قلته بسوي انقلاب لا وعلى اهلي بعد ، لو اسويها جد وتدور في بالي عدل واشن الحرب النفسيه شنو بيصيرررر

الدنيا برررررره شايشه ، والكل يطالب بحقه وينادون بالدستور ، انا اقول مالكم شغل وسو الي تسوونه هذا موقعكم وهذي مذكرتكم الخاصه فيكم ، اهما راح يشنغلون بسالفه غير هالسالفه لانهم يطلعون كل اسبوع موضوع ويطالبون فيه ويسوونه سالفه ويكبرونها ، والاسبوع الي وراه يطبون بشي ثاني .

المهم ....

كل عام وانتم بخير ... مقدما

ادري مبجره وايد بس احب اهنئكم من الحين

والكويت تستاهل كل خير

بمناسبة عيد الاستقلال وعيد التحرير

وناسه قبل كان ليوم 25 26 حلاوه مو طبيعيه ، خاصه ايام المسيره والكرنفالات ولما يسكرون شارع الخليج وكل واحد تشووفه ماسك كاميرا فيديو مووو تلفونات نقاله و رغواات هذي الخرابيط من اطلعت انا كرهت المسيرات حسيتها عبط وخبال وسوالف جهال ، احلى شي والله اذكررها لما كنا نحن على ابوي ساعه يبه تكفا خل نروح ونقوله دعايات يبه امانه خلك ويانه لين نكسر خاطره ويوافق بعدها يروح ابوي يأجر سووبر شكبره ويجمعنا كلنا احنا عياله وياخذ عيال جيرانه كلهم وعيال خوالي ونركب السوبر الي فيه فتحه فوق وكلنا نتهاوش على الدرايش ومنو يقعد صوبها ، طبعا عشان تعرفون الوضع انا كله مقطوطه ورا ومقفووووصه ومقعده فوقي اخوي الصغير وولد خالي الصغير مستانسين مع ان زحمه وصراخ بس وناااسه ومع ان ما نشووف شي ما نشوف شنو بره فيه بس الجو حماسي يحفزز ودك تقط نفسك من الدريشه ..

ويروح ابوي يشتري لنا نفيش وكتكات وكرتون عصير سانكست ويوزعه علينا جنه رايحين (بحمله) مو مسيره وطبعا ما يخلينا ننزل بس نطالع واحنا داخل السياره واذا قلناله ليش يقولنا اذا نزلتو بتضيعون منو يجمعكم انتو شكثركم ولا اذا نزلتو راح يهفكم صاروخ من الالعاب الناريه وكله نطلع من الساعه 4 العصر ونرد على المغارب الساعه 6 ونص جذي ، حالتنا كسيفه والله بس هممممم ونااااااسه ,.

شوفو هالصوره ذكرتني ايام المسيره والجو العجيييييييييييييييب

احب جذي لما يكونون متفقين يلبسون نفس الشي ويسوون نفس الحركات

وأحب مشاركه ذوي الاحتياجات الخاصه احس انهم فعلا مستانسين احب اشوف ابتسامتهم وفرحتهم مع اهلهم .

هذيل يا حظهم نازلين من السياره اما احنا بالصوره الي تحت :

عموما يارب يجعل ايامنا كلها اعياد وتغمرناااااااا الفرحه والسعاده

اللهم اجعل هذا البلد أمنا مطمئنا

وعيدي يا كويت

ستايلي :P

hi all

بما اني في بداية طريقي البلوقي احب في البدايه اعرفكم على (ستايل )حياتي ، طبعا ماعندي لا ستايل ولا شي بس احترت شنو اقدم لكم عن حياتي فقلت اعطيكم فكره عن اسلوب حياتي ، ومنها انا بعد اجيك على الطريقه الي قاعده اتعايش معاها كل يوم ، وفعلا لما فكرت وقلت انا شلون عايشه وشلون يمر اليوم علي وشلون وصلت 20 سنه على هالحال والله قلت اوووف ؟؟؟ لهدرجه هالشي صاير وانا مادري؟؟؟ ويت يا مناير شدعوه؟

حسيت اني مظلومه !! او !! مو مظلومه بس شوي حقي مبخوس .. مادري اهيا مبخوس ولا كلمه ثانيه المهم ان حقي مأخوذ

احس ان فعلا عايشه حياة الشيوعيه البدائيه .... الشي للكل .. مالك حق تملك اي شي .. الي تملكه لازم يشاركك فيه الكل

فكرت بجم شغله واستنتجت الفكره الي قلتها

مثلا يعني

انترنت و لاب توب مشترك

عندنا بالبيت لاب توب واحد على اساس ان حقي والله اذكر قبل اربع سنين انا الي حنيت لين انبح صوتي على ابوي وقلتله ابي لاب توب واذكر طولت على ما يبته وعلى ما اقتنع ابوي ان يشتريه بروحي من غير مساعده من اي وحده من خواتي ،،، فجأه صار الابتوب اول ما يا ملك للكل .. يعني حقي وحق اختي وحق اختي الثانيه والثالثه حقنا كلنا .. طبعا نقسم الوقت فيما بينا ويصير النت شفتات ، وواسطات ، وكل وحده تترجا الثانيه تعطيها ساعه زياده ،، والحين ثنتين اتزوجو صرت انا واختي بس وفجاه والله من غير مادري شلون? اهيا الي متحكمه فيه واهيا الي تتشرط وانا الي اطر منها النت .....

غرفة نوم مشتركه

كل يوم امي تزفني وتصرخ علي وتقولي انتييييييي مو مررررررتبه غرفتج عفسه . .. انصدم اقوم من النوم القى غرفتي تفشل لا الملابس بمكانهاولا التواليت مرتب وعفسسسسسسه .. اقولها والله يا ماما مو انا يا امي والله مو انا تقولي ماكو احد اهني اقولها بنتج الي في بيت ريلها الي مشاركتني الغرفه لما تيي تعفس الغرفه وتروح شسوي انا وارجع اعدلها وارتبها وانطر لين تيي اختي من بيت ريلها وتعفس الدار وتروح .. هذا غير لما تكون موجوده تدش تفتح الباب وانا نايمه ولا تفتح الليت وترووح ..مأاااااااااااااااااااساه

تلفزيون وفيديو مشترك

من غير سابق انذار قرر ابوي يحط التلفزيون والفيديو بداري انا واختي عشان الكل لما يبي يشوف التلفزيون يجي داري ويشوف لان الواير مال الستلايت بس واصل غرفتي مايوصل غرفه ثانيه طبعا تلفزيون للكل

في تلفزيون تحت وفي بالداوانيه بس بالطابق الثاني بس بداري

ملابس مشتركه

والله من انخلقت اذكر امي تروح للسوق وتييب ملابس جينزين وبلوزتين وتنورتين وتيشيرتين نفس المقاس او فري سايز وتقولنا هذا لكم كل وحده تبدل مع الثانيه.. اووالله شدعوه @@ .. بس والله جد وواحنا عادي كل وحده تيي تخمط الي تبيه وتروح ونبدل ماكو شي حق وحده معينه

حبيب مشترك

حتى بحبيبي (خطيبي ) مشاركيني فيه .. اهوا الاخ وحيد امه ماعندها غيره مابي اتكلم عنها وايد بس احس انها اهيا الي ودها تتزوجه مو انا .. الله يخليها لنا ، لوول عاد خالتي هذي قصه بقولكم عنها بعدين تنررررررررررفز بس اموت فيها والله يعني اضحك من اشوف حركاتها كل شي عازمه نفسها فيه المهم احس انها مشاركتي بالانسان عاد اهوا مسكين والله ماوده ادري بس عادي حلوه مشاركتها

سياره مشتركه

سيارتي من شريتها عمري ما مسكت السويج يومين على بعض كل يوم عند واحد يا ابوي يا امي يا اخوي يا السايق يا ولد جيرانا الكل الكل .. انا ما لاحظت هالشي ...؟؟

طبعا في اشياء مشتركه وايد احب اختصرها مثل البطانيات ، دلاغات ( انسى تعرف هذا دلاغ منو اخمط الي تبيه وتوكل على الله ) قلاصات ، نعال كرمكم الله ( على حسب لون بدلتج اخذي لا تسالين هذي نعال منو ) ، ملافع ، ... الخ الخ الخ

قمت اخاف من الي قاعد يصير .. صج الوضع يضحك .... ممكن الاغلب يعيش هالحاله خاصه البنات بس احسها بدائيه ..

يعني انا شوي شوي قاعده استقل ... قاعده اقول ان هالشي يروح مع السنين والخصوصيه لازم تكون موجوده سواءا الحين لابعدين ...

بس الحين شكلي بسوي انقلاب على البيت واسوي ثوره واقلب نظام الحكم من الشيوعيه الى الليبراليه على طووووول من غير مرور بالاشتراكيه لاني ما اعترف فيهاااااا ليبراليه وخلاص .. عشان الواحد يقدر ياخذ ويطالب بحقه على الاقل

والي فيه فزعه يجي يطب معاي .. يمكن يطلعله شي ( تلفزيون ، تلفون ) هذي الغنائم :p

والحمدلله على كل حال